Студенти од Академијата за графички дизајн при Семос Едукација изработија постери со пораки за емпатија, солидарност и поддршка за лицата со мултипла склероза. Проектот е реализиран по повод Светскиот ден на мултипла склероза во соработка со Националното здружение за помош и поддршка на лица со оваа состојба.
По повод Светскиот ден на мултипла склероза, студентите од генерацијата 2024/25 на Академијата за графички дизајн при Семос Едукација реализираа проект посветен на подигнување на јавната свест за лицата кои живеат со мултипла склероза. Во рамки на иницијативата, тие изработија креативни постери и визуелни решенија со пораки за разбирање, поддршка и намалување на стигмата.
Проектот е реализиран во соработка со Националното здружение за помош и поддршка на лица со мултипла склероза, а студентите работеа под менторство на професорката Даниела Спасева, во рамки на предмет посветен на општествено одговорни практики.
Преку истражување и визуелна интерпретација на темата, студентите создадоа дизајни кои имаат цел да поттикнат поголема емпатија и видливост на лицата со мултипла склероза во јавноста.
„Особено сме горди кога студентската креативност добива вистинска општествена вредност. Овој проект покажа дека дизајнот не е само визуелна комуникација, туку и моќна алатка за отворање важни теми, рушење предрасуди и поттикнување емпатија“, изјави Ангелина Канчевска, раководител на Академијата за графички и веб дизајн.
Постерите беа претставени на настан организиран во Europe House во Скопје, каде што беше прикажано и видео со студентските решенија и авторството на секој дизајн.
Светскиот ден на мултипла склероза секоја година се одбележува со цел подигнување на свеста за болеста, подобрување на пристапот до терапија и поддршка за пациентите, како и намалување на стигмата со која се соочуваат лицата што живеат со оваа состојба.
По повод одбележувањето, Семос Едукација на Националното здружение за помош и поддршка на лица со мултипла склероза му го додели признанието „SEMOS ACADEMY AWARDS“ за најдобар партнер на студентски проект од областа на општествено одговорни практики.
