Нафтената криза не стивнува. Саудиска Арабија ги намали испораките на сурова нафта кон Европа откако нападите со беспилотни летала сериозно го оштетија стратешкиот нафтовод Исток–Запад, објави Reuters.
Нападите, за кои Ријад ги обвини ирачките милиции, ја принудија Саудиска Арабија да го запре транспортот низ нафтоводот кој ги поврзува нафтените полиња во источниот дел на земјата со пристаништето Јанбу на Црвеното Море. Саудиските власти засега не соопштија кога транспортот би можел целосно да биде нормализиран.
Нафтоводот Исток–Запад во последните месеци доби особено големо значење бидејќи ѝ овозможуваше на Саудиска Арабија значителен дел од извозот да го пренасочи кон Црвеното Море и да го избегне Хормушкиот теснец, една од најважните светски точки за транспорт на нафта. Нафтоводот е долг околу 1.200 километри.
Според извори од трговијата и транспортната индустрија, Саудиска Арабија веќе ги известила европските купувачи дека дел од септемвриските испораки ќе бидат откажани. Истовремено е прекинат и утоварот на нафта во пристаништето Јанбу.
Цената на нафтата останува над 100 долари
Прекинот на саудиските испораки веднаш го засили притисокот врз глобалниот пазар.
Во вторникот Брент скокна за повеќе од три долари и се приближи до 110 долари за барел. Во средата, 16 септември, цената се повлече на околу 108 долари откако Саудиска Арабија почна да нуди дополнителни количества преку Оман, но останува на високо ниво поради стравувањата од нови нарушувања на снабдувањето.
Уште поголем притисок има на физичкиот пазар, каде што купувачите бараат нафта за непосредна испорака. Одредени товари во Европа надминаа 130 долари за барел, а северноморската нафта Forties достигна околу 136,75 долари за барел.
Пазарот е особено чувствителен затоа што нафтоводот Исток–Запад беше една од главните алтернативни рути за извоз во период кога транспортот низ Хормушкиот теснец е сериозно нарушен.
Полска бара замена за саудиската нафта
Меѓу европските компании кои директно ги чувствуваат последиците е полскиот енергетски гигант „Орлен“.
Саудиска Арамко обезбедува околу 40 проценти од суровата нафта што ја набавува компанијата. Поради нарушувањето на испораките, „Орлен“ веќе бара дополнителни количества од други пазари.
Компанијата обезбедува нафта од Северното Море и бара понуди за дополнителни испораки од САД, Казахстан, Алжир и Гвајана.
Од „Орлен“ велат дека нивните рафинерии во Полска, Литванија и Чешка засега работат без прекини. Но неизвесноста на пазарот останува висока бидејќи Саудиска Арабија е еден од најголемите светски извозници на сурова нафта, а секое подолго нарушување на нејзиниот извоз дополнително ја намалува понудата на веќе затегнатиот глобален пазар.
Саудиска Арабија во меѓувреме се обидува дел од испораките да ги пренасочи преку Оман, што донесе мало олеснување на цените, но не ја отстрани неизвесноста околу снабдувањето.
