Модата повторно се враќа во минатото, а ова лето на голема врата се враќаат пластичните сандали кои беа вистински хит во 70-тите и 80-тите години. За многумина од поранешна Југославија тие будат носталгија, додека други не можат да поверуваат дека повторно стануваат моден тренд.

Во продавниците веќе се појавија познатите „желатинести“ модели – рамни пластични сандали во пастелни бои, проѕирни балетанки и гумени модели инспирирани од ретро стилот. Овие обувки некогаш беа задолжителен дел од летните одмори и често се носеа на плажа, покрај базен или низ град.

Многумина веднаш се потсетуваат на Југопластика, фабриката која масовно ги произведуваше овие сандали по достапни цени. Дел од луѓето ги паметат како практична заштита од морски ежови, а други по плускавците и препознатливиот мирис на пластика.

Сепак, денешните модели се значително помодерни и поудобни. Особено популарни ова лето ќе бидат проѕирните „jelly“ балетанки, мрежестите пластични сандали, платформите и минималистичките гумени модели со медитерански изглед.

Враќањето на овој тренд дополнително го поттикнаа и познатите модни брендови. Jimmy Choo оваа сезона претстави луксузни „Jelly“ модели, додека Chloé во својата пролетно-летна колекција вклучи проѕирни гумени сандали и балетанки инспирирани од ретро естетиката.