САД и Иран влегоа во нова размена на напади со ракети и беспилотни летала, во момент кога преговорите за прекин на огнот се во застој и расте ризикот кризата на Блискиот Исток дополнително да се прошири.

Американските сили соопштија дека испалиле ракета „Хелфаер“ за да онеспособат танкер што, според нив, се обидел да ја пробие американската блокада на Ормутскиот теснец. Станува збор за ненатоварениот танкер M/T Lexie, кој пловел под знаме на Боцвана и се движел кон иранскиот остров Харг.

По нападот, Иран возвратил со ракети и дронови кон цели во регионот. Американската Централна команда соопшти дека две ирански ракети насочени кон Кувајт не ја погодиле целта или се распаднале во воздух, додека три ракети кон Бахреин биле пресретнати од американските и бахреинските сили. Во Кувајт се огласиле предупредувања, а јавноста била повикана да не се приближува до остатоци од пресретнати воздушни цели.

Иранската Револуционерна гарда тврдеше дека го нападнала седиштето на Петтата флота на САД во Бахреин, но Централната команда ги негираше тие тврдења. Американските сили, пак, соопштија дека извршиле напади врз иранска воена контролна станица на островот Кешм.

Новата размена на оган ја покажува кревкоста на обидите за дипломатско решение. Вашингтон тврди дека договор со Техеран сè уште е можен, но иранските власти предупредуваат дека секое кршење на прекинот на огнот на еден фронт, вклучително и во Либан, го доведува во прашање целиот процес.