САД се подготвени повторно да започнат напади врз Иран доколку не биде постигнат договор, изјави американскиот секретар за одбрана Пит Хегсет на безбедносниот форум „Шангри-Ла дијалог“ во Сингапур. Тој порача дека американската војска има капацитет повторно да дејствува ако биде потребно.

„Нашата способност повторно да започнеме, ако е потребно, е повеќе од доволна“, рече Хегсет, додавајќи дека американските залихи се подготвени и дека САД се во „многу добра позиција“.

Хегсет нагласи дека САД не го свртеле грбот на Азиско-пацифичкиот регион и покрај конфликтот со Иран. Според него, Вашингтон може „да прави две работи во исто време“ и ја засилува одбранбената индустриска база за да произведува повеќе муниција и да ги финансира воените планови низ светот.

Изјавата доаѓа додека преговарачите од Вашингтон и Техеран се обидуваат да ги надминат главните разлики што го блокираат договорот. Хегсет рече дека претседателот Доналд Трамп е „трпелив“ и сака „одличен договор“ што ќе гарантира дека Иран нема да добие нуклеарно оружје.

Трамп претходно најави дека ќе донесе конечна одлука за предлогот за завршување на војната со Иран, кој предвидува продолжување на примирјето од почетокот на април за уште 60 дена, со цел преговарачите да обезбедат траен крај на конфликтот.