Сè поголем број Американци сметаат дека економскиот систем не функционира фер и дека најмногу им користи на најбогатите. Новите анкети покажуваат пад на поддршката за капитализмот и раст на незадоволството од економската нееднаквост, тренд што се забележува и кај дел од традиционално конзервативните гласачи.

Според неодамнешна анкета на „Фокс њуз“, 65 отсто од испитаниците се согласуваат со ставот дека „системот е наместен во корист на богатите“. Овој процент е значително повисок во споредба со периодот од првиот мандат на Доналд Трамп, кога така мислеле 56 отсто од Американците.

Истовремено, позитивниот став кон капитализмот е значително намален. Додека во 2019 година капитализмот имал предност од 30 процентни поени меѓу позитивните и негативните оценки, денес разликата е само четири поени – 50 отсто од регистрираните гласачи имаат позитивно, а 46 отсто негативно мислење.

Незадоволство и кај републиканците

Особено внимание привлекува промената кај гласачите на Републиканската партија. Во 2019 година, 72 отсто од републиканците имале позитивен став кон капитализмот, додека денес тој процент е намален на 61 отсто.

Во исто време, бројот на републиканци кои сметаат дека економскиот систем е во корист на богатите се зголемил од 30 отсто во 2018 година на 42 отсто денес.

Истражувањата покажуваат дека економското незадоволство станува поширок општествен тренд. Анкета на „Волстрит журнал“ и NORC од јуни покажала дека помалку од половина Американци сметаат дека капитализмот функционира добро, што е пад во однос на пред една деценија.

Дополнително, истражување на „Пју рисрч центар“ покажува дека 61 отсто од Американците се загрижени поради чувството дека богатите не плаќаат фер дел од даноците. Со ова се согласуваат и 41 отсто од републиканските гласачи.

Економските реформи повторно во фокус

Аналитичарите оценуваат дека растечкото незадоволство може да ја зголеми привлечноста на политичарите кои ветуваат големи економски промени, без разлика дали тие политики се нарекуваат социјалистички или реформистички.

Токму економските теми стануваат едно од главните боишта пред изборите во САД. Додека Доналд Трамп и републиканците често ги напаѓаат демократските противници обвинувајќи ги за „социјализам“, дел од анализите покажуваат дека критиката на економската нееднаквост сè почесто наоѓа поддршка кај гласачите.

Промената во перцепцијата покажува дека прашањето за тоа кој има корист од економскиот систем станува една од клучните теми во американската политика.