Американскиот претседател Доналд Трамп застана во одбрана на својот син Доналд Трамп Јуниор, откако рускиот олигарх поврзан со Кремљ, Умар Кремљев, помогна во покривањето на трошоците за неговите свадбени веселби на Бахамите. На новинарско прашање во Овалната соба дали било соодветно неговиот син да прифати такви пари, Трамп одговори дека тоа е „целосно дозволено“, додавајќи дека според неговите сознанија, парите во меѓувреме му биле вратени на рускиот бизнисмен.
Во обраќањето пред новинарите во Овалната соба, Трамп изјави дека неговиот син првично не ни сакал да ги земе парите, но сепак ја оправда самата постапка.
„Лице што го познава, претпоставувам негов пријател, му организираше свадбена забава. Тоа е многу вообичаено“, рече американскиот претседател, посочувајќи дека и самиот тој организирал слични свадбени веселби за други луѓе на својот имот Мар-а-Лаго на Флорида. Трамп не приложи дополнителни докази или потврди за тоа кога и како средствата му биле вратени на рускиот олигарх.
Информацијата за финансирањето на свадбените веселби на Трамп Јуниор и неговата сопруга Бетина првично ја објави истражувачкиот портал ProPublica. Според нивното истражување, рускиот олигарх Умар Кремљев подмирил сметки во вредност од неколку стотици илјади долари за настаните што се одржаа во мај на Бахамите.
Дел од овие трошоци опфаќале изнајмување приватен остров по цена од околу 100.000 долари за една ноќ, како и раскошен огномет вреден приближно 70.000 долари.
Умар Кремљев е претседател на Меѓународната боксерска асоцијација (ИБА) и важи за фигура со директни релации со власта во Москва и со рускиот претседател Владимир Путин.
Поврзаноста на семејството на американскиот претседател со руски капитал и бизнисмени повторно предизвикува остри реакции во Вашингтон, особено поради фактот што Кремљев со години гради влијание во меѓународниот спорт поддржан од руски државни компании.
