Руски напад на воз со беспилотно летало во близина на украинско-полската граница имаше за цел директно да ги заплаши западните сојузници и да ја прекине поддршката за Украина, изјави високата претставничка на Европската Унија за надворешна политика, Каја Калас. Инцидентот се случи во неделата, непосредно откако истата релација ја помина дипломатски воз со поранешниот британски премиер Борис Џонсон и други европски претставници.
Руското беспилотно летало погоди патнички воз што сообраќал на линијата од Киев кон Варшава, на самата граница со Полска. Според официјалните податоци на полскиот железнички оператор „ПКП интерсити“ (PKP Intercity), во моментот на ударот во композицијата имало 206 патници.
Во нападот немаше жртви ниту повредени лица. Настанот предизвика сериозен дипломатски аларм бидејќи само малку претходно по истата пруга помина воз со странски претставници, меѓу кои беше и Борис Џонсон. Украинскиот претседател Володимир Зеленски оцени дека Москва свесно и со намера ја гаѓала железничката линија. Според проценките од Киев, постои веројатност цел на рускиот дрон да бил токму дипломатскиот воз, кој ја напуштил станицата нешто порано од планираниот возен ред.
Пристигнувајќи на Европскиот арктички самит во Рованиеми, Финска, високата претставничка на ЕУ испрати јасна порака дека ваквите воени потези нема да ја променат политиката на Брисел кон Киев.
„Јасно е дека ова е наменето за застрашување на западните земји за да престанат да ја поддржуваат Украина и да се откажат од патувањата таму за искажување солидарност“, изјави Калас.
Сличен став изнесе и францускиот министер за надворешни работи Жан-Ноел Баро од истиот самит во Финска. Баро посочи дека ударот врз железничката врска што ја поврзува Украина со членка на НАТО е пресметан чекор со кој Русија сака да посее страв и да создаде раздор меѓу европските држави. И покрај нападот, европските дипломати порачаа дека логистичките и политичките коридори кон Украина остануваат отворени.
