Бројот на работниците во индустријата во јули 2026 година е намален за 2,6% во однос на истиот месец минатата година, покажуваат податоците на Државниот завод за статистика. Најголем пад на вработеноста е забележан во секторот Рударство и вадење камен, каде што бројот на работниците е намален за 7,8%.

Во Преработувачката индустрија бројот на работници е намален за 2,3%, додека во секторот Снабдување со електрична енергија, гас, пареа и климатизација падот изнесува 0,9%.

Облека со пад на работници од 11,6%

Намалување на бројот на работниците е регистрирано кај сите главни индустриски групи. Најголем пад има кај нетрајните производи за широка потрошувачка, каде што бројот на работниците е намален за 3,6%. Кај енергијата падот изнесува 3,3%, кај интермедијарните производи, освен енергија, 2,4%, кај капиталните производи 2,3%, а кај трајните производи за широка потрошувачка 2,0%.

Во рамките на преработувачката индустрија, најголемо намалување има кај производството на облека, каде што бројот на работниците е намален за дури 11,6%. Значителен пад е забележан и кај производството на кожа и сродни производи, со намалување на бројот на работниците од 4,8%.

Електрониката бележи раст

Истовремено, некои индустриски дејности бележат пораст на бројот на работниците. Најголем раст е регистриран кај производството на компјутерски, електронски и оптички производи, каде што бројот на работниците е зголемен за 15,1%. Раст има и кај производството на тутунски производи, со 9,3%, како и кај производството на пијалаци, каде што бројот на работниците е зголемен за 2,8%.

Пад и во првите седум месеци

Трендот на намалување е видлив и во кумулативните податоци. Во периодот јануари–јули 2026 година, бројот на работниците во индустријата е намален за 2,8% во споредба со истиот период од 2025 година.

Податоците на Државниот завод за статистика покажуваат дека падот на вработеноста е најизразен во рударството и вадењето камен, како и во дел од традиционалните производствени дејности, додека одредени индустриски гранки, особено производството на електронски и оптички производи, продолжуваат да бележат раст.