Германската група Snap! во 1992 година, речиси случајно, испорачува трака што од клубски експеримент прераснува во светска химна. Песната “Rhythm Is a Dancer” прво кружи меѓу диџеи, се тестира во клуб и дури потоа, по силната реакција на публиката, добива зелено светло да излезе како официјален сингл.

Централна улога има вокалот Thea Austin, со рефрен кој веќе три децении го знаеме наизуст: „Rhythm is a dancer, it’s a soul’s companion, you can feel it everywhere“. Зад тој рефрен стои продуцентскиот тандем Michael Münzing и Luca Anzilotti, луѓето кои претходно го имаа „The Power“ и веќе знаеја како да спојат рап, хаус и поп чувствителност во клубски формат. Синт‑рифот не се појавува од нигде никаде. Инспириран е од electro наследството на 80‑тите и преработен во хипнотички hook кој веднаш ти влегува под кожа.

Интересно е што дел од стиховите, особено „I’m as serious as cancer when I say rhythm is a dancer“ во 90‑тите беа исмевани и спорни.

Раперот Turbo B воопшто не сакал да го изговори тој стих, сметајќи дека споредбата со канцер е премногу мрачна за денс химна.

Денес токму тој момент е дел од митологијата на песната: пример како евроденс може да биде cheesy, но и изненадувачки сериозен.

Резултатот е трака што се качува на прво место на низа европски топ‑листи и останува како еден од големите симболи на раните 90‑ти.

„Rhythm Is a Dancer“ ни покажува дека понекогаш најважните денс лекции се учат во клуб, а понеделник е совршен ден да се потсетиме дека ритамот навистина може да биде танчер, каде и да сме.