„Рајанер“, ирската нискобуџетна авиокомпанија потврди дека од зимската сезона 2026 година ќе ги суспендира сите летови до и од Ниш, односно од аеродромот „Константин Велики“.
Како причина за оваа одлука, компанијата ги наведе проблемите со регулативите за гориво што влијаат на работењето на аеродромите.
„За жал, од зимата 2026 година, ги суспендираме летовите до и од Ниш поради проблеми со прописите за гориво што влијаат на аеродромот“, објави компанијата за „Нова економија“.
Досега не е прецизно кажано за кои регулаторни проблеми се мисли. Една од можните причини е поврзана со ситуацијата околу Нафтената индустрија на Србија (НИС) и прашањето за снабдување со гориво за авиони во Србија.
„Рајанер“ ги воведе првите редовни летови од Ниш во септември 2016 година. Компанијата моментално оперира од аеродромот во Ниш на две годишни линии, до Виена и Малта, како и до две сезонски дестинации – Стокхолм, Арланда и Крф. Во текот на претходната зимска сезона, „Рајанер“ реализираше вкупно 314 летови помеѓу Ниш и неговите дестинации во двата правци и понуди 59.142 седишта.
Прекинот на летовите би можел да претставува голема загуба за аеродромот во Ниш, кој ќе остане без дел од патничкиот сообраќај што компанијата го остваруваше во текот на годината.
Веста за можно повлекување на „Рајанер“ од Ниш се појави порано, откако компанијата ја отстрани можноста за купување билети за летови од Ниш по завршувањето на летната сезона. Раководството на аеродромот „Константин Велики“ тогаш објави дека е во комуникација со претставниците на компанијата и дека очекува официјални информации.
„Во комуникација сме со менаџментот на компанијата „Рајанер“ и очекуваме официјален одговор и дополнителни информации за развојот на ситуацијата“, беше наведено претходно во писмениот одговор на аеродромот во Ниш до агенцијата Бета.
Во тоа време, од аеродромот потсетија дека „Рајанер“ предупредил за проблеми со снабдувањето со гориво, кои се поврзани со санкциите против НИС, на почетокот на јули.
