Инцидент со пукање се случи за време на годишната вечера на новинарите во Вашингтон, на која присуствувале околу 2.500 гости, меѓу нив и американскиот претседател Доналд Трамп.
Според американски медиуми, вооружен напаѓач успеал да се приближи до просторот каде се одржувал настанот и отворил оган, по што настанала паника и брза реакција на безбедносните служби.
Тајната служба веднаш го евакуирала Трамп и другите високи функционери, додека дел од гостите барале засолниште под масите. Еден агент бил повреден, но благодарение на заштитна опрема преживеал.
Инцидентот се случил за време на вечерата, кога гостите веќе биле послужени со храна и пијалаци, а првичните звуци од пукањето биле помешани со пад на предмети и врева во салата.
Покрај драматичните сцени, вниманието на јавноста го привлекоа и видеа кои станаа вирални на социјалните мрежи. На нив се гледа како дел од присутните, наместо веднаш да ја напуштат салата, фотографираат или земаат шишиња вино додека се евакуираат.
Овие снимки предизвикаа поделени реакции – дел од јавноста ги критикува ваквите постапки како несоодветни во кризна ситуација, додека други ги гледаат како човечка реакција во хаотични околности.
Напаѓачот е уапсен, а истрагата за мотивите е во тек. Засега, американските власти посочуваат дека станува збор за индивидуален напад без потврдена поширока поврзаност.
Настанот повторно отвори прашања за безбедноста на јавни собири со високи политички личности, особено во услови на зголемени безбедносни ризици.
