Смртоносен сој на птичји грип се проширил на оддалечени острови во близина на Антарктикот и предизвикал масовно угинување на морски животни и птици.
Околу 13.000 младенчиња фоки угинале на оддалечени острови во близина на Антарктикот, откако меѓу дивиот свет се проширил високопатоген сој на птичји грип H5, покажуваат процените на истражувачите.
Епидемијата ги погодила островите Херд и Мекдоналд, изолирана австралиска територија во јужниот дел на Индискиот Океан, на околу 4.000 километри југозападно од копнена Австралија. Овие острови долго време биле природно засолниште за морски птици, пингвини и морски цицачи.
Снимки направени со дронови од Австралиската антарктичка програма во октомври и јануари откриле голем број угинати младенчиња на јужни морски слонови по вулканските брегови на островите. Научниците ги опишале сцените како „отрезнувачки“, бидејќи покажуваат колку силно вирусот ја погодил локалната популација.
Според процените, угинале околу 76 отсто од младенчињата на јужните морски слонови родени на островите. Од вкупно околу 17.000 младенчиња, се проценува дека околу 13.000 не преживеале. На една локација, стапката на смртност достигнала дури 97 отсто.
Истражувачите сè уште не знаат какво влијание имал вирусот врз возрасните единки што се размножуваат на овие острови. Тоа ќе биде важно за да се процени долгорочната штета врз популацијата.
Покрај фоките, погодени биле и птиците. Податоците собрани во јануари покажале дека на островот Херд угинале и неколку стотици возрасни кралски пингвини, што е повисока смртност од вообичаената.
Научниците велат дека ова е прво потврдено откритие на птичји грип H5 на оваа австралиска надворешна територија. Според нив, случајот покажува дека вирусот продолжува да се движи кон исток низ субантарктичките острови.
Генетската анализа укажува дека вирусот најверојатно пристигнал на островите преку диви животни од француските субантарктички острови Крозе, кои се оддалечени околу 1.800 километри. Се претпоставува дека тоа се случило околу август 2025 година.
Сличен образец бил забележан и на други субантарктички острови, како Јужна Џорџија, каде што морските слонови исто така биле меѓу најтешко погодените видови.
До февруари оваа година, на копнениот дел на Австралија и во Нов Зеланд не бил регистриран случај на сојот H5N1, кој во последните години се прошири меѓу птиците низ светот и премина и кај дел од цицачите.
Резултатите од истражувањето се објавени во научното списание BioRxiv, но сè уште не поминале научна рецензија.
