Десетици илјади млади денеска протестираат во триесетина германски градови на повик на децентрализираното движење „Gen Z regelt“, кревајќи глас против засилената воена реторика и плановите за враќање на воениот рок. Собирите се закажани симболично за празничниот викенд, а германските безбедносни служби се во состојба на зголемена подготвеност. Движењето бара јасна иднина, социјална сигурност и деескалација, одбивајќи младата генерација да биде регрутирана за туѓи геополитички судири.
Иницијативата успеа за кусо време да активира широк фронт преку социјалните мрежи. На платформата „Gen Z regelt“ (Генерацијата З средува) до четвртокот се евидентираа речиси 146.000 пријавени граѓани.
Централните собири се насочени во пет клучни метрополи: Берлин, Хамбург, Келн, Франкфурт и Минхен. Во сите останати градови акциите се организирани самостојно од локални младински групи. Во Франкфурт интерес покажаа над 11.000 луѓе, додека пред Бранденбуршката порта во Берлин се очекуваат околу 10.000 учесници. Берлинските власти мобилизираа приближно 1.500 локални полицајци, со директна асистенција на сојузната полиција.
Во Дизелдорф, познатата трговска улица Кенигсале веќе доби сосема поинаков лик. Пред излозите на скапите бутици и златари уште од претпладнево беа поставени скелиња и дебели плочи од шперплоча.
Дел од сопствениците одлучија целосно да ја повлечат вредната стока и да не отвораат во текот на денот. Претставниците на трговските здруженија образложија дека станува збор за превентивни чекори, плашејќи се од можни тензии кога ќе се спојат празничната атмосфера, маските и масовниот притисок на улиците.
Барањата на германската младина не се изолиран феномен. Во време кога низ цела Европа, вклучително и во земјите од нашето опкружување како Хрватска и Србија, се враќа дебатата за задолжителен воен рок, отпорот на Gen Z покажува јасен расцеп меѓу политичките елити и генерациите што треба да го носат товарот на ремилитаризацијата.
Германските власти најавија мониторинг на сите протестни маршеви до доцните вечерни часови, со јасна наредба полициските кордони да останат дефанзивни доколку не дојде до нарушување на јавниот ред.
