Во вторник, 26 мај, во 20 часот во центарот Јадро ќе се одржи промоција на книгата „Надежта постои, но не за нас“ од Мирослав Грчев. Промотор ќе биде Бојан Иванов.

„Надежта постои, но не за нас“ е петта книга на авторот во едицијата „Градот“ на книгоиздателството Темплум. Првата книга текстови на Грчев објавувани во Слободен печат е издадена 2014 во под наслов „Името на злото“; „Фашизам во куси панталони“ излезе 2017; „Пирови победи на патот за Европа“ 2020 година; „Креативниот демон на глупоста“ во 2023 година.

Мирослав Грчев (1955) е редовен професор по урбанизам во пензија, на Архитектонскот факултет во Скопје. Посветено се бавел со карикатура, анимиран филм, графички дизајн, архитектура, урбанизам и теорија на урбаната форма. За градот пишува повеќе од три децении, а од раните 2000 пишува куси критички есеи за македонското опустошено општество и за удолниот релјеф на современите светски историски тенденции.

На првата страница на најновата книга Мирослав Грчев пишува:

Незабележливоста на глобалниот тоталитаризам се должи на неговата сеприсутност, на моќната повеќедецениска пропаганда што го претвори во нормалност, во единствена стварност, во вечна состојба во која „слободниот свет“ е безалтернативно нурнат. Оваа банална присутност е како перде фрлено преку очите на свеста, та фашизмот не се забележува и таму каде што вулгарно ги разоткрива од под „демократското“ здолниште своите обраснати чепунки.