На 3 октомври, 2026 година, за првпат во Скопје, ќе се одржи петтото издание на регионалниот книжевен избор „Штефица Цвек“.
„Почнуваме во 19:30 часот со официјално прогласување на изборот и дискурзивна програма во Центар Јадро, по што ќе следува забава со Disco Ninja во Љубов, од 21:30 часот.
Регионалниот книжевен избор „Штефица Цвек“ им оддава признание на феминистички, квир и поинаку политички ангажирани дела објавени на БХСЦ и на македонски јазик. Именуван по ликот од романот „Штефица Цвек во челустите на животот“ на Дубравка Угрешиќ, изборот го пренасочува вниманието од култот на авторот кон самиот текст, истовремено задржувајќи ироничен однос кон самата идеја за книжевна награда. Наместо да поттикнува компетитивност, „Штефица Цвек“ избира повеќе книги со цел да отвори разговор за квалитетна, критичка книжевност и да го зајакне духот на заедништвото“ велат организаторите.
Книжевниот избор е организиран од Коалиција Маргини, Побуњене читатељке, Нараториум и Комбинат Букса, а прогласувањето ќе се случи во рамки на Фестивалот за критичка култура – КРИК @critical.culture, под овогодинешната тема „Грижа: начини да се биде заедно“.
Книжевниот избор „Штефица Цвек“ годинава е реализиран со поддршката на Kvinna till Kvinna Foundation, Heinrich Böll Foundation – Sarajevo и Rekonstrukcija Ženski fond.
