Падна внатрешната мрежа на американската Агенција за национална безбедност

Привремениот прекин на доверливите комуникации принуди дел од вработените во Форт Мид да доцнат на работа, но критичните операции останаа активни.
Фото: Trevor Paglen, CC0, via Wikimedia Commons

Доверливата комуникациска мрежа на Агенцијата за национална безбедност на САД (НСА) доживеа привремен прекин во вторникот наутро за време на редовно планирано одржување. Како што соопшти разузнавачката служба, падот на мрежата погодил дел од внатрешните системи во седиштето во Форт Мид, Мериленд, без да ги загрози критичните безбедносни операции на земјата.

Вработените во НСА од раните утрински часови немале пристап до своите работни системи преку внатрешната мрежа позната како НСА Нет. Според информациите што ги пренесе американската телевизија Си-Ен-Ен, раководството на агенцијата побарало од дел од персоналот да пристигне подоцна на работните места додека техничките тимови работат на санирање на проблемот.

Во официјалното соопштение испратено до медиумите, НСА го опиша инцидентот како привремена деградација што настанала при рутинско одржување. Од агенцијата истакнаа дека состојбата не е критична и дека сите клучни разузнавачки функции продолжиле да работат без застој.

Инфраструктурата на доверливата мрежа на НСА е проектирана со повеќе слоеви на редундантност, односно резервни системи кои автоматски ја преземаат работата за да обезбедат континуитет при планирани сервисирања или неочекувани технички испади. Токму овие заштитни механизми спречиле целосна блокада на комуникациите.

Проблемот во седиштето во Форт Мид е најновиот во низата дигитални прекини што ја погодија американската инфраструктура во изминатиот период. Претходно, техничка грешка привремено ги блокираше трансакциите во дел од банките во државата, а на 11 ноември сериозен пад на комуникациските системи привремено ги приземји сите летови низ Соединетите Американски Држави.


Американските власти ги отфрлија сомнежите за надворешни упади и соопштија дека ниту падот на мрежата на НСА, ниту претходните прекини во банкарскиот и авионскиот сектор не се резултат на сајбер-напад.

е-Трн да боцка во твојот инбокс