Две руски воени групи кои, наводно, се борат на страната на Киев во војната во Украина – Легијата за слободна Русија и рускиот волонтерски корпус – рекоа дека влегле во рускиот регион Белгород во понеделникот и зазеле некои од околните села.
„Легијата и РВЦ целосно го ослободија селото Козинка, Белгородска област. Единиците за напад влегоа во Граиворон. Продолжуваме. Русија ќе биде слободна!“ сподели Легијата на социјалните мрежи.
Руските групи тврдат дека ослободиле најмалку две села – Козинка и Гора-Подол – во регионот што граничи со Украина. Локалните руски канали на Телеграм и медиуми објавија тешки борби во неколку села до границата, вклучително и Граиворон, град во кој се наоѓа руска воена база.
„Диверзантската група на Украинските вооружени сили влезе на територијата на областа Граиворонск. Вооружените сили на Руската Федерација заедно со Граничната служба, Руската гарда и ФСБ [разузнавачката служба] ги преземаат неопходните мерки за елиминирање на непријателот“, рече гувернерот на Белгород, Виачеслав Гладков во соопштението.
Тој подоцна на својот канал Телеграм додаде дека руските власти започнале „контратерористичка операција“, вклучително и проверки на лични карти и „суспендирање на активностите на индустриите кои користат „експлозивни, радиоактивни, хемиски и биолошки опасни материи“.
Украинскиот оддел за воено разузнавање тврди дека двете воени групи се состојат само од руски државјани и имаат цел да создадат демилитаризирана зона на границата со Украина.
„Да, денес рускиот волонтерски корпус и Легијата за слободна Русија, составена од граѓани на Руската Федерација, започнаа операција за ослободување на овие територии на регионот Белгород од таканаречениот режим на Путин и потиснување на непријателот со цел да се создаде одредена безбедносна зона за заштита на украинското цивилно население“, изјави Андриј Јусов, претставник на военото разузнавање на Украина, за украинската јавна телевизија „Суспилне“.
Украинските власти велат дека немаат никаква врска со овие напади, а Јусов ги спореди ваквите сепаратисти со ангажираните сепаратистички сили кои се борат во Украина.
Легијата за слободна Русија во понеделникот наутро објави видео изјава на својот канал Телеграм, во која тврди дека војниците кои упаднале во Белгород се Руси кои сакаат да ја ослободат Русија од Путин. „Останете дома, не се спротивставувајте и не плашете се: ние не сме ваши непријатели. За разлика од зомбите на Путин, ние не ги допираме цивилите и не ги користиме за наши цели. Слободата е близу“.
Извор: Politico
