На 13.10.2026 година, во Културниот центар Лабораториум премиерно ќе биде изведена театарската претстава „Татко“ во режија на Нина Николиќ, а во продукција на Перипетија Продукција.
Претставата е базирана на истоимената драма на Аугуст Стриндберг, но претставува современо читање на ова класично дело, реализирано преку адаптацијата на текстот на Тамара Барачков.
Адаптацијата ја поместува перспективата на оригиналната драма и нејзиниот централен конфликт го поставува во контекст на современите брачни и семејни односи.
Во фокусот е сложениот однос меѓу брачните партнери, надвор од едноставната поделба на жртва и виновник. Претставата ги преиспитува механизмите на моќ и контрола во интимните односи и начинот на кој психолошкото насилство постепено се развива, нормализира и ескалира во рамките на семејството.
Современата адаптација ја поместува и позицијата на женскиот лик: наместо обид да се докаже непресметливоста на сопругот, таа бара институционална помош и заштита поради психолошкото насилство на кое е изложена. На тој начин, Стриндберговиот конфликт се отвора кон прашања што директно комуницираат со современиот општествен контекст.
„Татко“ не е приказна за борбата помеѓу машките и женските принципи, туку приказна за луѓе заробени во деструктивен однос во кој недовербата, потребата за контрола и борбата за моќ постепено ја укинуваат можноста за дијалог. Претставата го отвора прашањето каде завршува конфликтот, а каде започнува насилството, но и прашањето за вината и одговорноста во однос што постепено доаѓа до точка на пукање.
Во претставата играат: Саша Ханџиќ, Амернис Нокшиќи, Тони Денковски, Бојан Кирковски и Ирена Димеска, сценографијата е на Илина Ангеловска, костимите на Ивана Каранфиловска Угуровска, а музиката на Оливер Јосифовски.
Проектот е поддржан од Министерството за култура и туризам на РСМ и од Амбасадата на кралството Шведска, а се реализира во продукција на Перипетија продукција.
Осврнувајќи се на поддршката што Амбасадата ја дава за оваа продукција, амбасадорот на Шведска, Ола Сулстром, изјави:
„Аугуст Стриндберг е еден од највлијателните шведски драмски писатели, а неговите дела продолжуваат да поттикнуваат размислување за прашања што остануваат крајно актуелни и денес. Во Амбасадата на Шведска веруваме дека културата претставува моќен мост меѓу нациите, создавајќи можности за дијалог, разбирање и посилни врски меѓу луѓето. Особено ни е драго што ја поддржуваме современата поставка на претставата ‚Татко‘ во продукција на ‚Перипетија продукција‘, која отвора важен простор за дискусија за родовите односи, динамиката на моќта, контролата и формите на психолошко малтретирање што можат да прераснат во родово засновано насилство. Шведска останува цврсто посветена на спречувањето и борбата против родово заснованото насилство и веруваме дека уметноста и културата можат да одиграат клучна улога во подигнувањето на свеста, преиспитувањето на штетните норми и поттикнувањето значајни разговори кои придонесуваат кон порамноправно и поинклузивно општество.“
Како дел од глобалната кампања „16 дена активизам против родово засновано насилство“, која се одржува од 25 ноември до 10 декември, Амбасадата на Шведска и „Перипетија продукција“ ќе покануваат младите да присуствуваат на изведбата на 9 декември. По изведбата ќе следидискусија за родово заснованото насилство и неговите пошироки последици за поединците, семејствата и општеството, со цел да се поттикне свесност, критичко размислување и дијалог за ова важно прашање.
Следните изведби на претставата се на 14.10.2026, 04.11.2026, 05.11.2026, 09.12.2026 и 10.12.2026
