Со натпреварите во групите Ј и К заврши групната фаза на Светското првенство, а по последните пресметки стана јасно и кој ќе биде противник на Хрватска во осминафиналето.
Португалија ќе игра против Хрватска
Во дербито од групата К, Колумбија и Португалија одиграа без голови (0:0) во Мајами. Иако немаше погодоци, натпреварот понуди многу возбудувања. Најдобрата можност за Португалија ја имаше Бруно Фернандеш во 39. минута, но неговиот удар од непосредна близина го одбрани голманот Камило Варгас.
Колумбија беше поопасна во второто полувреме, а во судиското продолжение Давинсон Санчез ја затресе мрежата по центаршутот на Хуан Фернандо Кинтеро. Сепак, по ВАР-проверката голот беше поништен поради офсајд.
Со овој резултат Колумбија го освои првото место во групата со седум бодови и во осминафиналето ќе игра против Гана, додека второпласираната Португалија со пет бодови ќе се сретне со Хрватска.
ДР Конго испиша историја
Фудбалерите на Демократска Република Конго го победија Узбекистан со 3:1 и за првпат во историјата обезбедија пласман во нокаут-фазата на Светско првенство. Узбекистан поведе преку Елдор Шомуродов во 10. минута, но Јоан Виса израмни од пенал во 68. минута. Фистон Мајеле направи пресврт за 2:1, а Виса во судиското продолжение ги постави конечните 3:1.
Во осминафиналето Демократска Република Конго ќе игра против Англија.
Аргентина со максимални девет бодови
Актуелниот светски шампион Аргентина ја заврши групната фаза со три победи. Џовани Ло Челсо донесе водство во 19. минута, а Лаутаро Мартинез од пенал зголеми на 2:0.
Јордан намали преку Муса Ал Тамари, но Лионел Меси, кој влезе од клупата, во 81. минута ги постави конечните 3:1. Тоа беше негов шести гол на турнирот и 19-ти во историјата на Светските првенства.
Алжир и Австрија приредија вистинска драма
Последниот патник во осминафиналето беше познат по спектакуларното реми меѓу Алжир и Австрија (3:3) Австрија двапати водеше со головите на Марко Арнаутовиќ и Марсел Забицер, но Алжир двапати се враќаше преку Рафик Белгали и Ријад Марез.
Во третата минута од судиското продолжение Марез погоди за 3:2 и во тој момент Австрија беше елиминирана, а Иран се пласираше понатаму. Сепак, само три минути подоцна Саша Калајџиќ постигна гол за 3:3 и донесе огромна радост за Австријците.
Австрија како второпласирана ќе игра против Шпанија, додека Алжир се пласира како една од најдобрите третопласирани селекции и во осминафиналето ќе се соочи со Швајцарија. Најголем губитник од драматичната завршница беше Иран, кој остана прв „под линијата“ и беше елиминиран и покрај трите ремија во групната фаза.
