Во италијанскиот регион Тоскана, голем шумски пожар веќе неколку дена се шири неконтролирано, поттикнат од силни ветрови. Поради опасноста, превентивно се евакуирани околу 3000 луѓе од загрозените подрачја. Пожарот зафатил повеќе од 800 хектари шумска површина на планината Фаети, која се протега меѓу покраините Лукa и Пиза.
Причина за пожарот
Според локалните власти, најверојатната причина за избувнување на огнот е неконтролирано палење на остатоци од кастрење маслинови дрвја, кое излегло од контрола. Регионалниот претседател на Тоскана, Еуџенио Џани, потврди дека силните ветрови во текот на ноќта дополнително го разгореле пожарот, што довело до масовни евакуации.
Италијанските пожарникари, заедно со три противпожарни авиони, се обидуваат да го локализираат пожарот, но условите се исклучително тешки. Локалните власти предупредуваат дека ситуацијата останува нестабилна и дека нема простор за опуштање, бидејќи силниот ветер продолжува да ја менува насоката и интензитетот на огнот.
Заменик-градоначалникот на Лукa, Фабио Барсанти, изјави дека сите ресурси се ангажирани, но дека моментално е невозможно да се предвиди понатамошниот развој на пожарот.
Овој пожар уште еднаш ја отвора темата за зголемената фреквенција и интензитет на шумските пожари во јужна Европа, особено во Медитеранот.
Комбинацијата од: високи температури, суви периоди и човечки фактор (неправилно палење на растителен отпад) создава услови во кои огнот многу брзо излегува од контрола.
Тоскана, како туристички и земјоделски регион, дополнително е ранлива бидејќи голем дел од населението живее во рурални и шумски подрачја каде евакуациите се сложени и брзи.
