Поради растот на цените на горивото, војната со Иран и падот на поддршката за Доналд Трамп, републиканците се обидуваат да ја задржат неговата мобилизациска сила, но без изборите да станат референдум за претседателот.
Републиканците ја прилагодуваат стратегијата пред изборите за Конгресот во ноември, во услови на пад на популарноста на претседателот Доналд Трамп, раст на цените на горивото и војна со Иран што се одолжи, пишува „Ројтерс“. Планот е да се искористи способноста на Трамп да ги мобилизира конзервативните гласачи, но истовремено да се избегне изборите да се претворат во референдум за сè понепопуларниот претседател.
На затворен состанок со водечки конзервативни изборни оперативци, политичките советници на Трамп предложиле кандидатите повеќе да ги истакнуваат републиканските даночни намалувања и мерките против инфлацијата. Меѓу присутните биле шефицата на кабинетот на Белата куќа Сузи Вајлс, политичкиот директор Џејмс Блер и долгогодишниот анкетар Тони Фабрицио.
Сепак, републиканците сакаат да избегнат Трамп лично да биде главната тема на кампањата. Дел од стратегистите стравуваат дека неговиот пад на популарноста може да им наштети на кандидатите во тесни трки за Конгресот.
Републиканската партија се соочува со тешка борба за задржување на мнозинството во Претставничкиот дом, а расте и ризикот од губење на контролата врз Сенатот. Според изворите на „Ројтерс“, кај дел од републиканските оперативци расте загриженоста дека политичкото влијание на Трамп слабее.
Дополнителен товар е застојот со Иран. Ниту воените, ниту дипломатските напори досега не го постигнаа посакуваниот резултат: денуклеаризација на Иран и повторно отворање на Ормускиот Теснец по два месеца војна.
Растот на цените на горивото може да го неутрализира ефектот од новите даночни политики, кои републиканците ги сметаат за клучен законодавен успех на вториот мандат на Трамп.
Според анкета на „Ројтерс“ и „Ипсос“, работата на Трамп ја одобруваат само 36 проценти од Американците, што е најниско ниво во неговиот актуелен мандат. Дел од гласачите, вклучително и некои републиканци, изразуваат загриженост и поради неговиот темперамент и јавни настапи.
„Демократите ќе се обидат да ги национализираат изборите и да кажат дека сме само печат на Трамп“, изјавил еден стратег близок до неговиот круг. „Мора да излеземе од тоа и да покажеме, трка по трка, зошто сме подобар избор.“
Во кампањата, републиканците сега сакаат поголем фокус на локални теми, економија, инфлација и даноци, наместо на лична лојалност кон претседателот. Во партијата и натаму сметаат дека Трамп е силен мобилизатор на базата, но веќе не е толку јасно дека неговото име треба да биде центарот на секоја изборна трка.
На почетокот на изборниот циклус, планот бил поинаков. Републиканците сакале да го стават Трамп во средиштето на кампањата и да ги претстават изборите како потврда на неговата политика. Сега, според извори запознаени со состанокот, тој пристап изгледа помалку привлечен.
„Политиката се промени“, изјавил еден извор. „Во јануари имаше смисла трката да се национализира околу него.“ Според истиот извор, гласачите не чувствуваат дека претседателот прави доволно за животот да им стане поевтин, но и натаму веруваат дека републиканците сакаат да го направат тоа.
Демократите, пак, гледаат можност да ги поврзат републиканските кандидати со неуспесите на Трамп, особено околу Иран, цените на горивото и економската несигурност.
Трамп во 2024 година водеше кампања како критичар на „глупавите војни“ и се претставуваше како „претседател на мирот“. Сега, како што оценуваат критичарите, тој ја надгледува најголемата американска воена операција од инвазијата на Ирак во 2003 година.
Неговата одлука да го продолжи примирјето на неодредено време беше протолкувана како знак на повлекување, додека Техеран и натаму ја задржува контролата врз Ормускиот Теснец и не се откажува од нуклеарната програма.
Поранешниот американски преговарач за Блискиот Исток, Арон Дејвид Милер, оценува дека Иран верува оти има предност поради важноста на нафтениот правец и дека може да издржи поголема економска болка од Трамп.
„Иранците мислат дека толеранцијата на Трамп за економска и политичка цена е ограничена“, изјави Милер. „Подготвени се да го чекаат.“
