Пожарот што попладнево избувна во Ресенско е подметнат и постои опасност да се прошири кон Пелистер, изјави директорот на Дирекцијата за заштита и спасување Стојанче Ангелов.

Огнот гори меѓу селата Бела Црква и Подмочани, каде што се зафатени борова шума и ниска вегетација. Првичните информации беа дека пожарот се движи во правец на туристичката населба Претор.

Ангелов предупреди дека доколку продолжи ширењето, огнот може да навлезе на планината Пелистер и да предизвика значително поголем пожар.

Тој тврди дека пожарот бил намерно предизвикан. Надлежните институции засега немаат објавено информации за можен сторител или за текот на истрагата.

Нема информации за повредени лица или за зафатени куќи и други објекти. На снимките од терен се гледа густ чад над поширокото подрачје на Ресен.

Во земјава до 18 часот денеска беа регистрирани 18 пожари на отворено, од кои осум останаа активни.