Еквадорскиот претседател Даниел Нобоа го прогласи петокот, 26 јуни, за државен празник откако фудбалската репрезентација на земјата ја победи Германија со 2-1 и обезбеди пласман во нокаут фазата на Светското првенство во 2026 година.

Одлуката на еквадорскиот претседател дојде кратко по историскиот триумф на тимот над четирикратниот светски шампион Германија на стадион во Њу Џерси, што предизвика ерупција од ентузијазам низ целата јужноамериканска нација.

Претседателот Нобоа, преку извршен декрет, ги суспендираше работните обврски за јавниот и приватниот сектор, за да може нацијата да го прослави успехот што се очекуваше две децении.

„Благодарност до играчите и тренерот кои, и покрај критиките, навредите и тешките моменти низ кои поминаа, успеаја да се издигнат и да ја донесат оваа огромна радост во целата земја. Утре е празник! Да живее Еквадор“, објави Нобоа на социјалните мрежи.

Еквадор влезе во решавачкиот натпревар од Групата Е со императив за победа, по поразот од Брегот на Слоновата Коска (0:1) и ремито без голови против Курасао.

Ситуацијата стана уште потешка кога Германија поведе во втората минута со голот на Лерој Сане. Сепак, „триколорите“ покажаа исклучителен карактер. Крилниот напаѓач на Сандерленд, Нилсон Ангуло, израмни во деветтата минута, пред Гонзало Плата, играч на бразилскиот Фламенго, да постигне гол во 77-та минута за целосен пресврт и една од најголемите победи во историјата на еквадорскиот фудбал.

Со овој резултат, Еквадор го освои третото место со четири бода и се пласираше во осминафиналето како една од најдобрите третопласирани екипи, повторувајќи го успехот од Светското првенство во 2006 година.