Хрватскиот премиер Андреј Пленковиќ изјави во парламентот дека Црна Гора нема да може да ги заврши пристапните преговори со Европската Унија доколку го отфрли договорот за копнено разграничување според начелата на Бадинтеровата комисија. Загреб веќе испрати предлог-договор до Подгорица, нагласувајќи дека неприфаќањето на поранешните републички граници како меѓудржавни претставува директна пречка за нејзиното европско интегрирање.

Обраќајќи им се на пратениците во Хрватскиот сабор, премиерот Андреј Пленковиќ прецизираше дека прашањето за копнената граница меѓу двете држави директно ќе влијае врз европската патека на Подгорица. Одговорот уследи по пратеничко прашање од пратеникот на ХДЗ, Андро Крстуловиќ Опара, кој ги отвори несогласувањата околу спомен-плочата во логорот Морињ и изјавите на црногорскиот претседател Јаков Милатовиќ.

Пленковиќ наведе дека официјален Загреб веќе испратил нацрт-договор за копнената линија, посочувајќи дека меѓународните стандарди не оставаат простор за заобиколување.

„Ако на Црна Гора тоа не ѝ одговара, тогаш испраќа порака дека не може да го прифати начелото на Бадинтеровата комисија и дека не верува во начелото дека републичките граници се воедно и граници меѓу државите настанати по поранешната СФРЈ“, рече Пленковиќ. Тој децидно додаде дека во такво сценарио Црна Гора нема да успее да ги финализира пристапните преговори според зацртаниот план.

Иако Подгорица на 20 октомври направи чекор кон смирување на тензиите со одлуката за преименување на базенот во Котор кој го носеше името на чуварот од логорот Морињ, Зоран Гопчевиќ, а потоа одобри и спомен-обележје, хрватската страна бара целосно затворање на сите отворени гранични точки.

Официјален Загреб со овој потег јасно стави до знаење дека инсистирањето на републичките граници останува црвена линија за секое идно проширување на Европската Унија кон југот.