Жалба од незадоволен купувач за кусок од само десет грама леб го чинеше баварскиот пекар Матијас Брајтнер 15.000 евра. Сопственикот на семејната пекарница од градот Пфафенхофен на Илм мораше итно да набави дигитални ваги за сите свои десет продажни места, откако локалните инспектори утврдија дека со децении ги продавал пресечените половинки леб без претходно мерење пред купувачите.

Семејниот бизнис на Брајтнер со децении продава половинки леб со проценка на око, сечејќи го секој испечен леб точно на средина. Проблемот започна кога еден купувач дома ја измерил купената половина и забележал дека таа тежи десет грама помалку од половината на декларираната тежина на целиот леб. На забелешката испратена преку електронска пошта, пекарот одговорил со шега: „Некогаш добиваш, некогаш губиш, следниот пат сигурно ќе има десет грама повеќе“.

Купувачот, сепак, не го прифатил хуморот и случајот го пријави до Баварската служба за мерителство и верификација.

Инспекторите утврдија дека практиката на сечење без мерење ја прекршува германската Уредба за пакување (Fertigpackungsverordnung), со која се спроведуваат европските стандарди за заштита на потрошувачите. Според правилата, продавачот мора или да го продава лебот во фабрички запечатено пакување со декларирана грамажа или секое исечено парче да го измери на верификувана вага директно пред очите на купувачот.

Со оглед на тоа што пекарницата продава свеж и незапакуван леб, Брајтнер немаше друг избор освен да купи опрема.

За да продолжи со работа без казни, сопственикот мораше да опреми десет филијали. Секоја баждарена вага поврзана со наплатниот систем чини околу 1.500 евра, со што конечната сметка достигна 15.000 евра.

Брајтнер изјави дека иако инвестицијата претставува неочекуван финансиски удар за мал бизнис, правилата мора да се почитуваат. Одлуката предизвика јавна дебата во Германија за границите меѓу строгата заштита на потрошувачите и бирократскиот притисок врз занаетчиите.