Единаесет лица се повредени откако автобус за јавен превоз утрово излета од патот во Хусино кај Тузла, според податоците на полицијата на Тузланскиот кантон. Несреќата е пријавена околу 6:10 часот, а на местото се упатени полициски патроли и екипа на Итната медицинска помош.

Еден пациент задржан на болничко лекување

Повредените се пренесени во Универзитетскиот клинички центар во Тузла.

Портпаролката на болницата, Ерсија Ашчериќ Мујединовиќ, изјави дека во установата се јавиле седум лица, а еден пациент е задржан на Клиниката за ортопедија и трауматологија поради повреди на долните екстремитети. Полицијата, пак, располага со податок за вкупно 11 повредени.

Сообраќајот се пренасочува

Поради увидот, сообраќајот на магистралниот пат М-18, на делницата Шиќки Брод – Живинице, е целосно запрен, а возилата се пренасочуваат по алтернативен правец.

За несреќата е известен дежурниот кантонален обвинител. Увидот го вршат истражители од криминалистичката полиција во Тузла, а на местото е присутен и сообраќаен вештак. Причината за излетувањето на автобусот засега не е утврдена.