Познатиот шпански режисер Педро Алмодовар доби громогласен аплауз од меѓународните новинари на прес-конференцијата во Кан, каде што го претставува својот нов филм „Горчлив Божиќ“. Тој рече дека „Европа никогаш не смее да му биде потчинета на Трамп“ и носеше значка „Слободна Палестина“ на реверот. Неговата изјава дојде како одговор на прашање за заканата од цензура, објави „Варајати“.

Моралната должност на уметникот

„Ова е многу загрижувачко за нас“, рече Алмодовар, коментирајќи ги загриженостите за цензурата поттикната од ситуацијата во Соединетите Американски Држави и контроверзноста околу францускиот Канал+, чиј раководител се закани дека ќе ги стави на црната листа уметниците кои се спротивставуваат на главниот акционер на компанијата. Тој ги повика уметниците да не се предаваат на таквите стравови.

„Не сакам никого да осудувам, но мислам дека уметниците мора да проговорат за ситуацијата во која живеат во современото општество. Тоа е морална должност“, рече режисерот. „Тишината и стравот се симптоми дека работите одат во погрешна насока. Тоа е сериозен знак дека демократијата се урива. Напротив, креаторите мора да проговорат. Најлошото што може да се случи е да се молчи или да се биде цензуриран. Имаме морална обврска да проговориме.“

Алмодовар ги повика своите колеги уметници да „дејствуваат како штит против ова лудило“.