Папата Лав XIV ќе ја предводи велепеточната процесија на Крстниот пат во Колосеумот во Рим и лично ќе го носи крстот. Со овој чин се продолжува традицијата на одбележување на страдањето на Исус Христос.
Папата Лав XIV ќе ја предводи процесијата на Крстниот пат во Колосеумот во Рим, еден од најзначајните христијански обреди за Велики петок. Оваа церемонија го симболизира патот на страдањето на Исус Христос до Голгота, каде бил распнат.
Новиот папа ќе го носи крстот за време на процесијата, враќајќи ја традицијата која минатата година беше прекината поради здравствените проблеми на папата Франциско.
Покрај тоа, папата Лав XIV го продолжи и ритуалот на миење нозе, кој има длабока симболика на служба, понизност и посветеност кон другите. Облечен во бела ленена престилка, тој им ги изми нозете на 12 римски свештеници, а потоа ги избриша и бакна, следејќи ја гестата на Христос кон апостолите.
Во својата проповед, папата цитираше зборови на својот претходник Франциско, нагласувајќи дека оваа должност произлегува од срцето и се извршува со љубов.
Папата Лав XIV беше избран во мај како 267. папа во историјата на Католичката црква и ја предводи заедницата од околу 1,4 милијарди католици ширум светот.
Во недела, тој ќе го упати традиционалниот велигденски благослов „Урби ет Орби“ пред десетици илјади верници на Плоштадот Свети Петар во Ватикан.
