Академијата за филмски уметности и науки воведе нови правила со кои се регулира употребата на вештачка интелигенција во филмовите што конкурираат за Оскар. Најзначајната промена се однесува на сценаријата, каде што отсега ќе можат да се натпреваруваат исклучиво дела напишани од луѓе.
Од 99-тото доделување на Оскарите во 2027 година, Академијата ќе има право да проверува на кој начин и во колкава мера е користена вештачката интелигенција при создавањето на филмот. За да биде прифатен во категориите за оригинално или адаптирано сценарио, текстот мора целосно да биде напишан од човечки автори, со јасен фокус на вреднување на креативноста на луѓето.
Промени се воведуваат и во актерските категории, каде што улогите ќе мора да бидат изведени од вистински актери со нивна согласност. Ова следува по контроверзии во индустријата, откако беа користени технологии за „оживување“ на починати актери, што отвори дебата за границите на дигиталната интервенција.
Дополнително, новите правила дозволуваат актерите да добијат повеќе номинации во иста категорија, што значи дека теоретски е можно да се натпреваруваат сами со себе. Истовремено, се менуваат и условите за категоријата за најдобар меѓународен филм, каде што ќе може да учествуваат повеќе филмови од иста земја.
Академијата направи и други прилагодувања поврзани со кастингот, шминката и фризурата, како и начинот на промоција на филмовите во трката за награди, со цел да се обезбеди поголема транспарентност и фер конкуренција.
