На 27 мај, со почеток во 20 часот, на сцената на Националната опера и балет, во рамките на 54. издание на фестивалот „Мајски оперски вечери“ ќе биде изведена оперската класика „Травијата“ од Џузепе Верди.

Едно од најпознатите дела во светската оперска литература повторно доаѓа пред скопската публика со приказна што повеќе од век и половина ја задржува својата драмска сила. Создадена според романот „Дамата со камелии“ од Александар Дима синот, „Травијата“ ја носи приказната за Виолета Валери, љубовта, жртвата и судирот меѓу личната слобода и општествените норми.

Во продукцијата на Националната опера и балет диригент е Гергељ Кесељак од Унгарија, режијата е на Верена Штојбер од Германија, а сценографијата и костимографијата се на Софија Шнајдер. Кореограф е Саша Евтимова, концерт-мајстор е Јане Бакевски, а хор-мајстор е Јасмина Ѓоргеска.

Во улогата на Виолета Валери ќе настапи Теа Пурцеладзе од Грузија, Алфред Жермон ќе го толкува Алесандро Фантони од Италија, а Жорж Жермон ќе биде Бадрал Чулунбатар од Монголија. Во останатите улоги настапуваат Марика Поповиќ, Александра Лазаровска Василевски, Кристијан Антовски, Драган Ампов, Никола Стојчевски, Невен Силјановски, Игор Гиновски и Тихомир Јакимовски, заедно со хорот, оркестарот и балетскиот ансамбл на Националната опера и балет.

„Травијата“ е опера во три чина, со либрето на Франческо Марија Пјаве. Првпат била изведена на 6 март 1853 година во театарот „Ла Фениче“ во Венеција, а денес е едно од најизведуваните дела на оперските сцени во светот.

Во рамките на 54. „Мајски оперски вечери“, кои се одржуваат од 9 до 31 мај, публиката годинава има програма составена од дела на Пучини, Верди и Чајковски, меѓу кои „Сестра Анџелика“, „Џани Скики“, „Риголето“, „Тоска“, „Мадам Батерфлај“, „Лебедово езеро“, „Травијата“ и „Набуко“. Со тоа фестивалот останува една од најважните културни точки на мајската сцена во Скопје, во која домашниот ансамбл настапува заедно со меѓународни солисти и уметници.