На последното рочиште во Основниот кривичен суд Скопје, одбраната на поранешниот директор Нино Васев побарала постапката да се води поефикасно и без непотребни одложувања. Воедно, адвокатите повторно изнеле забелешки за начинот на кој се презентираат дел од доказите и документацијата во предметот. 

Одбраната на второобвинетиот Нехат Нухи, пак, инсистирала детално да се читаат и разгледуваат сите материјални докази, сметајќи дека тоа е неопходно за фер постапка и целосно утврдување на фактите. Во претходните рочишта адвокатите на обвинетите оспоруваа дел од доказите, тврдејќи дека некои документи не биле доставени во оригинал или заверена копија. 

Случајот „Онкологија 2“ се однесува на поранешните директори на Клиниката за радиотерапија и онкологија, Нино Васев и Нехат Нухи, кои се обвинети за злоупотреби при набавка и управување со биолошка терапија во периодот од 2018 до 2022 година. Според обвинението, со незаконски постапки бил оштетен државниот буџет за околу 36 милиони евра. Обвинетите ја негираат вината и тврдат дека процесот е политички мотивиран. 

Паралелно со овој предмет, против Васев и уште неколку лекари се води и посебен процес поврзан со наводно несовесно лекување пациенти на Клиниката за онкологија. Судењето за „Онкологија 2“ продолжува со доказна постапка и сослушување сведоци и експерти.