Нов извештај на UN Women предупредува на сериозен и растечки проблем со злоупотребата на вештачката интелигенција и deepfake технологиите, кои сè повеќе се користат за таргетирање на жени во јавниот живот. Истражувањето опфаќа над 640 жени од 119 земји, вклучувајќи новинари, активистки и бранителки на човекови права, и покажува дека онлајн насилството има директно влијание врз нивното учество во јавната сфера.
Според податоците, 27% од испитаничките добиле несакани сексуални содржини или интимни слики, додека 12% биле жртви на споделување лични фотографии без согласност. Дополнително, 6% пријавиле дека биле цел на deepfake или манипулирани сексуални содржини генерирани со вештачка интелигенција.
Извештајот предупредува дека овие напади често се организирани и намерни, со цел да се замолчат жените, да се наруши нивниот професионален кредибилитет и да се поткопа нивниот јавен глас. Последиците се сериозни: над 40% од жените изјавиле дека се самоцензурираат на социјалните мрежи за да избегнат злоупотреби, додека 19% се повлекле од професионални јавни настапи.
Психолошките последици се исто така значајни една четвртина од испитаничките пријавиле анксиозност или депресија, а 13% биле дијагностицирани со посттрауматско стресно нарушување.
Истражувачите истакнуваат дека развојот на AI технологијата ја олеснил и забрзал продукцијата на штетни содржини, овозможувајќи креирање на реалистични, но лажни слики и видеа за само неколку минути. Ова значително го зголемува ризикот од онлајн злоупотреба.
Извештајот укажува и на слабите институционални реакции: само 25% од случаите се пријавуваат, а од нив само 15% резултираат со правна постапка. Дел од жртвите велат дека при пријавување биле обвинувани или прашувани што „самите направиле за да ја предизвикаат ситуацијата“.
UN Women повикува на итна едукација на полицијата и правосудните органи, како и на посилна регулација на големите технолошки компании, со цел да се спречи понатамошна ескалација на технологијата-фацилитирано насилство врз жените.
