Обединетите нации предупредуваат дека светот треба да се подготви за скорешно враќање на климатскиот феномен Ел Нињо, кој значително ги засилува екстремните временски услови на глобално ниво.Според најновата проценка на Светската метеоролошка организација (WMO), постои околу 80% веројатност Ел Нињо да се формира пред септември, а околу 90% шанса да продолжи најмалку до ноември.

Научните модели укажуваат дека претстојниот Ел Нињо би можел да биде барем со умерен интензитет, а постои можност да стане и силен феномен, нешто што би имало сериозни последици врз глобалната клима. Генералниот секретар на ОН, Aнтонио Гутереш, предупреди дека светот мора сериозно да го сфати овој сигнал.

„Ел Нињо ќе додаде гориво на веќе загреаниот свет“, изјави Гутереш, нагласувајќи дека ефектите ќе бидат поинтензивни и ќе се чувствуваат на глобално ниво.

Феноменот Ел Нињо се јавува на секои неколку години и трае околу 9 до 12 месеци. Тој настанува кога топлите океански струи во Тихиот Океан се поместуваат и ја зголемуваат температурата на морската површина. Ова води до промени во глобалните временски обрасци посилни врнежи и поплави во делови од Јужна Америка, САД и Источна Африка, суши во Австралија, Индонезија и делови од Јужна Азија и зголемен ризик од екстремни временски настани ширум светот.

Влијание врз глобалната клима

Ел Нињо може да влијае и на формирањето на урагани, ги засилува во делови од Тихиот Океан, но истовремено може да ги ослабне во Атлантикот. Научниците предупредуваат дека 2023–2024 веќе донесе еден од најсилните Ел Нињо циклуси досега, кој придонесе за рекордно топла 2024 година.

Климатските експерти предупредуваат дека новиот циклус би можел дополнително да ги наруши глобалните системи за производство на храна, особено во региони кои веќе се погодени од климатски промени. Според анализите, комбинацијата од климатски шокови и геополитички притисоци може да доведе до сериозни последици за земјоделството и снабдувањето со храна.

ОН повторно апелираат на забрзување на климатската транзиција, намалување на зависноста од фосилни горива и подобрување на системите за рано предупредување, со цел да се ублажат последиците од екстремните временски услови.