Околу 50 луѓе побарале лекарска помош во првите неколку часа од отворањето на годинешниот Октоберфест во Минхен, соопшти дежурната медицинска служба „Aicher Ambulanz Union“. Првиот итен повик пристигнал само девет минути по отворањето на фестивалскиот простор во 9 часот наутро. Медицинските тимови веднаш интервенирале кај посетители со расекотини на главата, повреди на лицето и конвулзивен напад, главно предизвикани од падови при традиционалното утринско трчање кон пивските шатори на Терезиенвизе.
🍻🏃♂️Wiesn-Auftakt: Erste Gäste stürmen Münchner Oktoberfest
— Marie (@kripp_m) September 19, 2026
…wie die Verrückten…unglaublich🤦♀️ pic.twitter.com/fNbBIYnopk
Отворањето на портите во Минхен уште еднаш донесе масовен притисок врз фестивалската инфраструктура. Иако служењето пиво започна дури напладне, илјадници луѓе уште во 9 часот наутро јурнаа низ ливадата за да фатат слободна клупа. Притоа настанале бројни сопнувања и турканици.
Покрај конвулзивниот напад и санирањето на расекотини од падови, лекарите интервенирале и кај 50-годишен Германец со кардиоваскуларни тегоби, приближно 20 минути по официјалниот старт на манифестацијата. Мажот итно е префрлен во минхенска болница, а лекарите се сомневаат дека неговата здравствена состојба се влошила поради стрес и возбуда во толпата.
Спротивно на вообичаените очекувања, алкохолот не бил главната причина за полните раце работа на дежурните лекари во утринските часови. Првиот официјален случај на акутно труење со алкохол е евидентиран во 15:45 часот. Помош побарале пријатели на 19-годишен жител на Минхен кој веќе не можел да стои на нозе, по што санитарниот тим му ги проверил виталните параметри и му вклучил инфузија.
На Терезиенвизе првиот ден се распоредени 150 членови на медицински екипи, вклучително и десет лекари специјалисти. Во текот на шеснаесетте дена фестивал, за здравјето на милионската публика ќе се грижат околу 430 санитарни работници и 36 лекари.
