Одрон го погоди едно од главните појдовни места за искачување на јапонската планина Фуџи и затрупа три возила, но според досегашните информации нема повредени. Одронот се случил на паркинг кај петтата станица на патеката Фуџиномија, популарна почетна точка за планинарите кои се упатуваат кон врвот. Инцидентот следувал по обилните врнежи што зафатија големи делови од централна Јапонија.
Јапонската метеоролошка агенција соопшти дека пред одронот во текот на ноќта и утрото имало силни врнежи во планинските подрачја на префектурата Шизуока. Поради големото количество дожд е затворена и линијата Фуџи Субару, еден од главните пристапни патишта кон планината.
Последици од невремето во регионот
Во поширокото подрачје околу планината Фуџи се регистрирани и други инциденти. Полицијата во префектурата Шизуока соопшти дека рано утрото на патеките биле пронајдени двајца планинари во бессознание. Надлежните, сепак, не го поврзуваат овој случај со одронот.
Во градот Каванехон, пак, вчера вечерта се случил друг одрон при кој загинал еден работник. Невремето со силен дожд вчера вечерта ги погодило и соседните префектури Аичи и Гифу. Според јапонската агенција Кјодо, во поплавите биле повредени 41 лице.
Во Нагоја, главниот град на префектурата Аичи, за само еден час паднале рекордни 104,5 милиметри дожд. Јапонската јавна телевизија NHK јави дека силните врнежи предизвикале нарушувања во сообраќајот и големи гужви на градските железнички станици.
Јапонската метеоролошка агенција предупреди дека обилните врнежи во областите од североисточниот до западниот дел на земјата се очекува да продолжат до денеска попладне.
