Телото на поранешниот командант на Војската на Република Српска, Ратко Младиќ, е пренесено во Воено-медицинската академија (ВМА) во Белград, каде што ќе биде извршена обдукција за да се утврдат причините за неговата смрт. Информацијата ја потврди заменик-началникот на ВМА, Иван Лековиќ, кој изјави дека резултатите од обдукцијата, како и наодите од дополнителните анализи и тестови, ќе им бидат доставени на семејството и на надлежните институции во најкраток можен рок.

Лековиќ изјави дека обдукцијата ќе биде извршена на барање на семејството на Младиќ, врз основа на писмо од министерот за правда. Телото на Младиќ пристигна во Србија со авион на српската влада, кој од Хаг слета на аеродромот „Никола Тесла“. Оттаму телото беше транспортирано до ВМА.

По пристигнувањето на телото во Белград, во медиумите и на социјалните мрежи беа објавени снимки од граѓани кои се собрале на повеќе места долж трасата по која минувал транспортот. Дел од нив носеле транспаренти и факели.

Ратко Младиќ почина на 27 август 2026 година, додека се наоѓаше во притвор во Меѓународниот резидуален механизам за кривични трибунали во Хаг, каде што ја издржуваше казната доживотен затвор.

Според информациите објавени во јавноста, Младиќ претходно претрпел повеќе мозочни удари. Неговото семејство и адвокатите во повеќе наврати барале да му биде овозможено лекување во Србија, но барањата биле одбиени.