Црната боја и натаму е најчестиот избор кога станува збор за патнички куфери. Неутрална е, лесно се комбинира и успешно ги прикрива нечистотијата и гребаниците. Но, токму нејзината популарност може да им создаде проблеми на патниците – особено кога треба да го препознаат својот багаж меѓу десетици речиси идентични куфери на аеродромската лента.

Според податоците наведени во анализата на Радио-телевизија Србија (РТС), црните куфери заземаат околу 40 до 45 отсто од светскиот пазар. По нив следуваат сините со околу 30 отсто и сивите со приближно 20 отсто. Црвените се поретки и сочинуваат околу 10 отсто од продажбата.

Така, темните и неутралните нијанси доминираат во багажот што секојдневно поминува низ светските аеродроми.

Зошто црните куфери се толку популарни?

Црната боја е практична и безвременска. Деловните патници често ја избираат поради елегантниот и професионален изглед, а патниците што сакаат багажот да изгледа уредно и по повеќе патувања ја ценат затоа што на неа помалку се забележуваат нечистотијата и ситните оштетувања.

Но, кога стотици луѓе на истиот аеродром имаат куфери со слична големина и боја, препознавањето станува вистински предизвик.

Како црниот куфер може да доведе до забуна или кражба?

Ирската авиокомпанија „Рајанер“ во 2024 година ги посочи црните, темносините и сивите куфери како багаж што лесно може да се помеша со туѓ. Компанијата ги советуваше патниците да избираат попрепознатлив багаж или да додадат детали по кои веднаш ќе го препознаат својот куфер.

Проблемот не е само во случајното преземање туѓ багаж. Куфер без препознатливи ознаки може полесно да биде однесен од некој што ќе се обиде да ја искористи сличноста меѓу патничките торби.

Експертот за безбедност при патување Боб Арно предупредува дека крадците можат да ја искористат токму оваа визуелна униформност, бидејќи црниот куфер лесно може да се замени со друг или да се оправда неговото земање како случајна грешка.

Бојата, сепак, не е формален критериум според кој безбедносните служби одлучуваат дали некој багаж ќе биде дополнително проверен. Кај контролите на американската Управа за безбедност на транспортот, одлуките зависат од содржината на куферот и резултатите од скенирањето, а не од неговата надворешна боја.

Кои бои се попрактични за патување?

Куферите во розова, виолетова, зелена, портокалова или жолта боја полесно се забележуваат меѓу останатиот багаж. Препознатливи се од далечина и ја намалуваат можноста да ги помешате со туѓи.

Фил Денглер, коосновач на туристичкиот веб-сајт „Вејкејшнeр“ (The Vacationer), ги издвојува и посветлите нијанси како беж, светлосина и бела. Во последните години се забележува интерес и за пософистицирани тонови како крем, боја на слонова коска, маслинеста и бордо.

Сепак, не мора да купувате нов куфер само поради неговата боја.

Имате црн куфер? Еве како да го направите препознатлив

Ако веќе имате црн куфер и не планирате да го замените, неколку едноставни детали можат да направат голема разлика: Ставете шарена лента или преп ознатлив украс на рачката. Користете навлака или ремен во впечатлива боја. Закачете светла ознака со вашите контакт-податоци. Изберете налепници или други уникатни детали што лесно ќе ги забележите. Фотографирајте го куферот пред да го предадете на аеродромот.

Најважно е багажот да има неколку јасни и лесно препознатливи обележја. Така ќе го пронајдете побрзо на лентата, а ќе им биде потешко и на другите патници случајно да го земат вашиот куфер.