Нетфликс го објави трејлерот за „The One About Matthew Perry“, триделна документарна серија посветена на животот, кариерата и наследството на актерот кој светската публика го запозна како Чендлер Бинг во „Пријатели“.

Серијата ќе биде премиерно прикажана на 27 октомври, во пресрет на третата годишнина од смртта на Пери. Ја режира Мери Робертсон, а во неа зборуваат членови на неговото семејство, блиски пријатели и луѓе со кои работел.

Меѓу соговорниците се неговата сестра Миа Пери Бојик, блиските пријатели Дејвид Пресман и Роџер Кастиљо и поранешниот претседател на NBC, Ворен Литлфилд.

„Јавноста знаеше само дел од неговата приказна“

Во трејлерот се слуша и гласот на самиот Пери, кој зборува за телевизискиот успех, славата и цената што доаѓа со неа.

Документарецот ја следи неговата кариера, но и годините во кои се соочувал со зависност и повеќекратно се обидувал да се лекува.

Приказната не се потпира само на архивски материјали. Авторите користеле и досега необјавени фотографии и видеоснимки од семејната архива.

Режисерката Мери Робертсон вели дека јавноста го познавала само делот од приказната за Пери.

„Затоа го снимивме овој филм – за луѓето што го познаваа и го сакаа Метју да ја откријат личноста зад јавниот лик“, вели Робертсон.

Сестра му: Сакав да го прикажам како цел човек

За серијата зборува и сестрата на Пери, Миа Пери Бојик, која вели дека ѝ било потребно време пред да биде подготвена да ги сподели личните спомени.

Таа нагласува дека сакала брат ѝ да биде прикажан како целосна личност, а не само како Чендлер од „Пријатели“ или како човек кој се борел со зависност. „Метју имаше прекрасно срце и благороден дух“, вели таа, додавајќи дека и во најтешките моменти знаел да ги насмее луѓето и да направи да се чувствуваат сакано.

Бојик се надева дека серијата ќе им помогне на луѓето што го сакале Пери, лично или преку неговата работа, подобро да разберат кој бил и какво наследство оставил.

Од Чендлер до животот зад камерите

Метју Пери стекна светска популарност со улогата на Чендлер Бинг во „Пријатели“, една од највлијателните телевизиски серии од 1990-тите и 2000-тите. Но неговата кариера опфати и филмски, телевизиски и театарски улоги, како и работа како комичар.

Документарната серија се обидува да го помести фокусот од најпознатиот лик што го играше и да ја раскаже неговата приказна преку луѓето што го познавале надвор од сцената.

„The One About Matthew Perry“ ќе биде достапна на Нетфликс од 27 октомври.