Хортензиите се едни од најубавите летни цветови за двор, градина или тераса, но за да цветаат богато од година во година, им треба правилна нега уште од садењето. Иако изгледаат раскошно и деликатно, експертите велат дека не се премногу тешки за одгледување ако им се обезбедат вистинско место, доволно вода и добро подготвена почва.
Според „Архитекчурал дајџест“, хортензиите најдобро успеваат во климатски зони од 3 до 9 и не поднесуваат добро многу жешки и суви услови. Самото име на растението потекнува од грчките зборови за вода и сад, што јасно покажува колку ова растение има потреба од влага.
Најдобро време за садење е рана пролет. Така растението има време да развие корен пред летните горештини. Може да се сади и во рана есен, но само ако има доволно време да се вкорени пред првиот силен мраз.
Хортензиите сакаат почва што е постојано влажна, но не и премногу натопена. Честа заблуда е дека тие најдобро успеваат во целосна сенка. Можат да растат и таму, но без доволно светлина нема да цветаат добро. Најдобро е да добиваат утринско сонце и делумна сенка во најжешкиот дел од денот.
При садење треба да се остави доволно простор. Ако сортата може да порасне шест до осум стапки во висина и ширина, треба да ѝ се даде толку простор уште од почеток. Така растението ќе биде поздраво, поприродно обликувано и ќе има помала потреба од агресивно кастрење.
Водата е најважниот дел од негата. По садењето, хортензијата треба редовно да се полева во првата сезона, особено додека се развива кореновиот систем. Кај растенија во саксии, влагата треба да се проверува и кога врне, бидејќи понекогаш водата само поминува низ земјата без добро да ја навлажни.
Малчот е многу корисен за хортензиите. Слој од два до три инчи околу растението помага да се задржи влагата и да се заштити коренот од сушење и прегревање.
Кај крупнолисните хортензии, бојата на цветовите може да зависи од киселоста на почвата. Во покисела почва цветовите можат да станат сини, а во поалкална розови. За намалување на pH-вредноста може да се користи сулфур, кој експертите го посочуваат како побезбеден избор од алуминиум сулфат, бидејќи премногу алуминиум може да биде штетен за растението.
Ѓубрењето треба да биде умерено. Најдобро е да се користи гранулирано ѓубриво со бавно ослободување. Кај хортензии во саксии, пожолтување или бледозелена боја на листовите може да биде знак дека на растението му недостигаат хранливи материи.
Кастрењето зависи од видот. Хортензиите што цветаат на нови гранки треба да се кастрат кон крајот на зимата или рана пролет, пред да почне новиот раст. Оние што цветаат на стари гранки се кастрат по летното цветање. Ако не сте сигурни кој вид го имате, подобро е да кастрите помалку — најчесто е доволно да се отстранат сувите гранки и прецветаните цветови.
Пред зимата, хортензиите треба да се полеваат до првиот силен мраз, бидејќи растението складира вода за студениот период. Потоа може да се додаде околу два инчи малч за дополнителна заштита. Кај хортензии во саксии, експертите советуваат саксијата да се закопа во градината за коренот полека да влезе во зимско мирување, наместо растението да се чува во гаража или шупа.
Важно е и да се знае дека хортензиите можат да бидат токсични за миленици, како мачки и кучиња. Ако миленик џвака листови, може да се појават симптоми како повраќање, дијареја или омалаксаност, па растението треба да се држи подалеку од животни што имаат навика да грицкаат растенија.
