Нападот со нож во лондонската населба Голдерс Грин, во кој беа тешко повредени две лица, се третира како терористички инцидент, потврди британската антитерористичка полиција. Помошник-комесарот Лоренс Тејлор изјави дека „високо специјализиран“ тим работи заедно со Метрополитен полиција, во координација со безбедносните служби, за да се утврдат сите околности на нападот.
Една од клучните линии на истрагата е дали нападот бил намерно насочен кон еврејската заедница во Лондон.
„Ги повикуваме граѓаните да бидат внимателни и да покажат поддршка кон заедниците кои вечерва се чувствуваат загрозено“, порача Тејлор, додавајќи дека полицијата мобилизира дополнителни сили низ земјата.
Комесарот на Метрополитен полиција, Марк Роули, откри дека осомничениот има историја на сериозно насилство и проблеми со менталното здравје. Тој го оцени нападот како „грозен чин на насилство“ што ќе предизвика шок и гнев кај јавноста, особено поради тоа што бил насочен кон еврејската заедница.
Двајцата повредени мажи, припадници на еврејската заедница, биле нападнати со нож пред синагога додека ги извршувале секојдневните активности. Осомничениот бил совладан на самото место од припадници на Шомрим, по што бил уапсен од полицијата.
Британскиот премиер Кир Стармер го опиша инцидентот како „длабоко загрижувачки“ и порача дека државата ќе преземе решителни чекори. Во меѓувреме, Министерство за надворешни работи на Израел остро реагираше, оценувајќи дека британските власти повеќе не можат да тврдат дека антисемитизмот е под контрола.
Истрагата е во тек, а безбедносните мерки низ Лондон се засилени, додека властите се обидуваат да утврдат дали станува збор за изолиран напад или дел од поширока закана.
