Хрватска и оваа година се најде меѓу водечките европски дестинации за љубителите на плажите, откако дури пет нејзини плажи беа вклучени на листата на 50-те најубави плажи во Европа. Меѓу нив се Подраче и Пунта Рата во Брела, Пасјача кај Дубровник, Златни Рат на островот Брач и Сакарун на Дуги Оток.

Рангирањето го подготви проектот „The World’s 50 Best Beaches“ врз основа на мислењата на повеќе од илјада туристички експерти и познавачи на светските плажи. Според организаторите, оценувањето не се темели само на популарноста, туку и на целокупното искуство што го нуди секоја локација.

При изборот се земени предвид чистотата, природната убавина, уникатноста и автентичноста на плажите. Особено високо се оценуваат местата кои ја зачувале својата природна средина и нудат поинакво искуство од масовниот туризам.

На врвот на листата доминираат плажи од Грција, Шпанија и Италија, но внимание привлекуваат и атрактивни локации во Ирска, Норвешка и Исланд, што покажува дека најубавите европски плажи не се ограничени само на Медитеранот.

Од хрватските претставници најдобро е рангирана плажата Подраче, додека на листата се најдоа и Пасјача, Златни Рат, Пунта Рата и Сакарун, потврдувајќи ја репутацијата на Хрватска како една од најпосакуваните летни дестинации во Европа.