Цените на нафтата повторно пораснаа на светските пазари, откако се намалија надежите за брз договор меѓу САД и Иран и за повторно стабилизирање на сообраќајот низ Ормускиот Теснец.

Брент нафтата денеска се искачи за околу 2 проценти, над 106 долари за барел, додека американската WTI нафта ја надмина границата од 100 долари. Пазарите реагираат на стравот дека кризата може да продолжи и да предизвика нови нарушувања во снабдувањето.

Главната причина за новиот раст се кревките преговори меѓу Вашингтон и Техеран. Американскиот претседател Доналд Трамп го отфрли иранскиот одговор на мировниот предлог како „целосно неприфатлив“, што повторно ги зголеми стравувањата дека примирјето може да пропадне.

Ормускиот Теснец останува клучната точка на кризата. Низ него вообичаено поминува околу една петтина од светската трговија со нафта и гас, па секој застој, закана или дипломатски неуспех веднаш се претвора во повисоки цени на енергенсите.

Аналитичарите предупредуваат дека, ако не дојде до договор до крајот на мај, цените може дополнително да растат. Од друга страна, евентуален пробив во преговорите би можел брзо да ја намали цената на нафтата и да го смири притисокот врз глобалните пазари.