Цената на нафтата Брент падна под 80 долари за барел за првпат од март. Инвеститорите очекуваат договор меѓу САД и Иран што би можел да го отвори Ормускиот Теснец и да го стабилизира снабдувањето со нафта.

Цената на нафтата падна под 80 долари за барел за првпат од почетокот на март, поттикната од оптимизмот дека САД и Иран се приближуваат до договор за прекин на конфликтот и повторно отворање на Ормускиот Теснец – една од најважните светски рути за транспорт на нафта.

Барел нафта од типот Брент поевтини за 5,4 проценти и се тргуваше по цена од 78,66 долари. Само пред неколку недели цената надминуваше 100 долари за барел поради стравувањата од нарушување на снабдувањето со енергенси.

Падот на цените на нафтата се одрази и на финансиските пазари. Индексот S&P 500 благо ослабе, додека Dow Jones забележа раст. Во исто време, технолошките акции поврзани со вештачката интелигенција продолжија да осцилираат, при што Nvidia загуби 1,7 проценти од вредноста, а Micron Technology 3,5 проценти. Иако инвеститорите се надеваат на долгорочен договор меѓу Вашингтон и Техеран, преговорите и натаму се соочуваат со сериозни предизвици, особено околу иднината на иранската нуклеарна програма.