МЗТ Скопје Аеродром по пауза од 25 години повторно ќе настапува во европско натпреварување под организација на ФИБА. За клубот ова претставува важен чекор во враќањето на европската сцена, иако домашните трофеи остануваат главна цел и во новата сезона.
Извршниот директор Филип Ѓоревски вели дека настапот во ФИБА Еврокупот бил една од неговите најголеми цели уште од доаѓањето во клубот.
„Играњето во Европа ми беше желба уште од првиот ден кога дојдов во клубот. Летово конечно се поклопија сите услови за да го реализираме тој план. МЗТ Скопје, како најтрофеен и најдоминантен македонски кошаркарски клуб во последните години, има обврска да ја претставува Македонија и на европската сцена“, изјави Ѓоревски.
Тој додава дека покрај освојувањето на домашните титули, клубот сака повторно да ја врати атмосферата од времињата кога во „Јане Сандански“ гостуваа екипи како Реал Мадрид, Улм, Порто и Бенфика.
Амбиции и во Европа
Во МЗТ очекуваат сериозни предизвици во групната фаза од ФИБА Еврокупот, но веруваат дека можат достоинствено да го претставуваат македонскиот клупски баскет.
„Добивме квалитетна и тешка група. Никого не потценуваме, но веруваме во сопствените можности и ќе се обидеме да оставиме добар впечаток“, истакнува Ѓоревски.
Тим со баланс меѓу искуството и младоста
Паралелно со подготовките за Европа, клубот работи и на комплетирање на играчкиот кадар.
Продолжена е соработката со Дамјан и Војдан Стојановски, а во клубот се вратија и македонските репрезентативци Лука Стојановски и Никола Василевски. Од МЗТ најавуваат и нови засилувања, кои ќе бидат претставени во наредниот период.
„Целта не е само да собереме квалитетни индивидуалци, туку да изградиме тим кој ќе функционира како целина. Истото важи и за странските кошаркари, бидејќи сакаме да ги избегнеме грешките од минатото“, вели директорот.
Фокус и на младинската школа
Во клубот значајни промени има и во младинскиот погон, каде координатор стана Саша Димитријевиќ.
Според Ѓоревски, неговото долгогодишно искуство во развојот на млади кошаркари треба повторно да ја направи школата главен извор на играчи за првиот тим.
Финансиска стабилност по тешкиот период
Ѓоревски оценува дека во изминатите пет години клубот направил голем исчекор и на организациски план.
„Кога го презедовме клубот затекнавме сериозни финансиски проблеми и големи долгови. Денес МЗТ Скопје е финансиски многу постабилен и убеден сум дека наскоро целосно ќе ги затвориме сите наследени обврски. Голема заслуга за тоа имаат Општина Аеродром и нашите спонзори, кои постојано ни даваат поддршка“, нагласува тој.
Подготовките за новата сезона ќе започнат во средината на август, кога тренерот Васко Атанасов ќе ја изврши првата прозивка. Пред МЗТ Скопје следува сезона во која клубот ќе се бори за нови домашни трофеи, но и за успешен камбек на европската кошаркарска сцена.
