Австралиско-македонскиот стендап комичар Саш Мишевски, познат како My Cousin Vlad, неделава за првпат настапува во земјата на своите корени со две целовечерни шоуа. Првиот настап е закажан за 23 септември во Домот на културата во Охрид, а вториот на 24 септември во Театар Комедија во Скопје. Македонската публика ќе ја види неговата нова меѓународна турнеја насловена „Total Spin Out“, изведена во целост на англиски јазик.
Саш Мишевски е роден и израснат во Сиднеј во македонска заедница. Неговата комичарска кариера започна во 2019 година сосема спонтано, со снимање кратки хумористични видеа во автомобил. Форматот веднаш привлече широка публика на социјалните мрежи, што го поттикна да го трансформира проектот во целосна професионална патека.
Пред да изгради препознатливо стендап име, Мишевски работел како агент за недвижности, а во помладите години бил и главен вокал во рок-бенд. Денес тој зад себе има серија самостојни настапи, авторски видеосодржини и сопствен подкаст под наслов „Dis Dat with My Cousin Vlad“.
Хуморот на Мишевски се потпира директно врз неговото лично искуство на човек распнат меѓу две различни средини. Во своите настапи тој редовно ги обработува семејните односи, балканските навики, традиционалните очекувања и секојдневните апсурди на животот во дијаспората.
Токму таа комбинација на австралиска реалност и македонски корени стана негов заштитен знак пред публиката низ дијаспората во Австралија, САД, Канада и Велика Британија. Новата европска турнеја за 2026 година го носи пред домашната публика, на сцените во Охрид и Скопје, во организација на „Друга страна ивентс“.
