Еден ваков настан се одржа во храмот Донгхваса, планински храм што датира уште од 8 век. Се пријавиле повеќе од 1.580 луѓе, а според Би-би-си, биле примени само 20 до 30 луѓе. Целиот настан траел околу 30 часа.
Сè започнало со ситни гестови. Младите момчиња се понудиле да им ги носат торбите на девојките, трудејќи се да покажат добри манири. Потоа следеле заеднички активности како правење торти и шетање низ шумата околу храмот. Имало и шоу за таленти каде што учесниците пееле, свиреле на инструменти или зборувале странски јазици, а навечер, девојките сами си ги избирале партнерите за вечера.
Ако некој дечко и девојка си се допаднеле, тоа го покажувале со роза. На крајот се споиле осум парови, од кои два пара биле луѓе од организацијата и учесници.
Друг, понов ваков настан се одржал во Наксанса, храм на врв на рид основан во 671 година на североисточниот брег на Јужна Кореја. Ројтерс јавува дека овој пат се пријавиле рекордни 4.225 луѓе за само 20 места, што покажува колку брзо расте интересот за овие програми. Таму сè траело два дена наместо еден. Учесниците по случаен избор се спојуваат во парови преку влечење стапчиња со бројки или преку спојување на нивните лични предмети. Се запознаваат на чај, преку прошетки во шума и вежба за градење доверба каде што на едниот партнер му ги врзуваат очите, а другиот го води по камена патека кон една порта за која локалната легенда вели дека ги исполнува желбите.
„Искрено, се зборува дека наталитетот опаѓа и дека сè повеќе луѓе избираат да не се мажат и женат, но сите околу мене всушност прават свадби“, изјавила за Ројтерс 30-годишната Чои Је-ри, која учествува за првпат. Таа додала дека претпоставувала оти ваква програма со селекција ќе привлече посериозни кандидати. Почитуваниот Дорјун, шеф на Корејската будистичка фондација за социјална помош која ја води програмата во Наксанса, им порачал на учесниците дека се надева оти овде ќе имаат време да размислат за проблемот со нискиот наталитет.
Стапката на фертилитет во Јужна Кореја и понатаму е најниска во светот, но забележано е подобрување. Таа се искачи на 0,80 во 2025 година, за разлика од 0,75 во 2024 година, што е втора година по ред како бележи раст. Владата предвидува дека населението, кое моментално брои 51,8 милиони, ќе се намали за речиси една третина до 2072 година.
Поскапувањето на трошоците за живот е една од причините зошто луѓето го одложуваат родителството. Многу млади луѓе исто така ја ставаат кариерата пред семејството. Експертите посочуваат и на уште еден фактор, младите Јужнокорејци помалку излегуваат на состаноци од порано, а многумина едноставно избираат да си останат сами.
Локалните власти и граѓанските организации реагираат со организирање вакви настани за запознавање, со надеж дека монасите ќе успеат таму каде што апликациите за запознавање и владините субвенции потфрлија.
