Националната галерија вечер го отвора 16. Младински пролетен салон во Мултимедијалниот центар Мала станица. Овогодинешната тема е пејзажот како инспирација, а изложбата претставува творби на ученици и студенти од средни училишта и факултети. Проектот е поддржан од Министерството за култура и туризам.
Пејзажот е мотив кој нуди широк спектар на уметнички интерпретации
Темата за овогодинешниот Салон, пејзажот, е избрана поради нејзината универзалност и блискост до уметниците. Учесниците имале слобода да го интерпретираат мотивот низ различни призми: марини, урбани пејзажи, зимски, летни, пролетни и есенски сцени. Автор на проектот е едукаторот на Националната галерија, Ацо Таневски, а манифестацијата е дел од едукативната програма на Галеријата за 2026 година.
Изложбата останува отворена до 15 мај
Покрај уметничката димензија, организаторите ја истакнуваат и општествената вредност на настанот: Младинскиот пролетен салон е можност за социјализација и интеграција на младите преку дружење, забава и едукација. На најуспешните учесници ќе им бидат доделени награди и признанија од страна на жири-комисија. Изложбата ќе може да се посети во Мала станица до 15 мај 2026 година.
