Меѓународен тим научници откри досега непознат екосистем на дното на Тихиот Океан, каде што живеат стотици видови кои никогаш претходно не биле регистрирани. Откритието доаѓа во период кога се разгледуваат планови за комерцијална експлоатација на ретки метали од морското дно.

Во рамките на петгодишна научна мисија, истражувачите поминале 160 дена на отворено море и се спуштиле на длабочина од околу 4.000 метри во зоната Кларион-Клипертон, која се наоѓа помеѓу Мексико и Хаваите. Истражувањето, објавено во научното списание Nature Ecology & Evolution, имало за цел да го документира животот во еден од најмалку истражените делови на планетата.

Научниците собрале повеќе од 4.300 примероци и идентификувале 788 различни видови, од кои најголемиот дел се целосно непознати за науката. Меѓу нив има необични морски црви, ракови, мекотели, како и нов вид осамен корал. За нивна идентификација биле користени современи ДНК анализи, бидејќи класичните методи не биле доволни.

Истражувањето предупредува и на можните последици од длабинското рударење. Тестирањата покажале дека работата на тешката механизација го намалува бројот на животни за околу 37 проценти, а разновидноста на видовите значително опаѓа во погодените области.

Поради тоа, научниците апелираат до Меѓународната управа за морското дно да обезбеди строга заштита на најмалку 30 проценти од оваа област во Пацификот. Тие предупредуваат дека неконтролираното искористување на природните ресурси може трајно да уништи уникатни екосистеми пред тие целосно да бидат истражени.