ехнолошкиот гигант Meta најави нови претплатнички верзии на своите најпопуларни платформи – Facebook, Instagram и WhatsApp. Новите услуги ќе бидат достапни под имињата Facebook Plus, Instagram Plus и WhatsApp Plus, а корисниците ќе добијат дополнителни функции и ексклузивни можности.
Според информациите од компанијата, Meta со овој потег сака да ја намали зависноста од приходите од рекламирање и да развие нов претплатнички модел. Корисниците на Facebook Plus и Instagram Plus ќе имаат пристап до напредни алатки за анализа, подетални статистики за прегледи и дополнителни опции за персонализација на профилите.
WhatsApp Plus ќе биде насочен кон подобрување на корисничкото искуство преку премиум стикери, прилагодливи мелодии за известувања и други персонализирани функции. Од Meta засега не откриваат целосен список на новитети кои ќе бидат дел од пакетите.
Иако официјалните цени сè уште не се потврдени, дел од медиумите пренесуваат дека претплатата за Facebook Plus и Instagram Plus би можела да чини околу 3,99 долари месечно, додека WhatsApp Plus би бил нешто поевтин.
Компанијата планира во иднина сите Plus услуги да ги обедини под заедничкиот бренд „Meta One“. Уште во 2023 година Meta во Европа воведе верзии на Facebook и Instagram без реклами, како одговор на построгите правила на Европската унија за приватност и користење на кориснички податоци.
